Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Bestu fréttirnar

Skrifað af Ágúst Valgarð Ólafsson. Posted in Pistlar

Sumt þykir okkur svo sjálfsagt að við tökum varla eftir því rétt eins og fiskurinn sem veit ekki að hafið er til því hann þekkir ekkert annað. Tökum mannréttindi sem dæmi. Okkur íslendingum þykir sjálfsagt að mannréttindi séu virt á okkar landi og erum fljót að rísa upp ef á þeim er brotið.

Ef enginn Guð er til þá er hinsvegar erfitt að rökstyðja mannréttindi. Ef manneskja er ekkert nema þróað dýr, er þá einhver munur á mér og hundinum mínum annar en hvar í eldhúsinu skálin okkar er staðsett? Hvers vegna ætti ég þá að hafa einhver réttindi umfram hundinn?

Segjum að enginn Guð sé til. Það er ekkert til nema efni, orka og náttúrulögmál. Ekkert nema atóm á hreyfingu. Hvernig getum við þá rökstutt virði og gildi fyrir manneskju? Vísindin segja okkur að alheimurinn muni að lokum kulna út. Stór svarthol gleypa pláneturnar uns allt er flatt út. Þetta er vísindaleg staðreynd eins langt og þekking okkar nær núna. Ekkert sem nokkur manneskja gerir skiptir þá neinu máli þegar horft er til langs tíma.

H. G. Wells fjallar um þetta þema í skáldsögunni Tímavélin. Þar ferðast söguhetjan 30 milljón ár inn í framtíðina til að sjá framgang mannkyns og finnur þar ekkert nema deyjandi jörð en enga menn. Þegar hann fer enn lengra inn í framtíðina sér hann jörðina smám saman hætta að snúast og alheiminn kólna niður.

Ef þetta er sannarlega framtíðarsýn guðleysis, hvers vegna skiptir þá eitthvað máli, þar með talið mannréttindi?

Staðreyndin er sú að ekkert annað en fagnaðarerindið gefur almennilegan grunn og rökstuðning fyrir mannréttindi. 

Fagnaðarerindið eru þær góðu fréttir að Guð varð maður í Jesú Kristi. Hann lifði lífinu sem við áttum að lifa og dó þeim dauða sem við áttum að deyja – í okkar stað. Þremur dögum síðar reis hann upp frá dauðum og sannaði þannig að hann er Sonur Guðs og býður hjálpræði öllum þeim sem iðrast og trúa á hann.

 Guð skapaði mig og þig í sinni mynd. Þess vegna höfum við virði og tilgang, bæði núna og inn í óendanlega framtíð með Guði. Þetta er fagnaðarerindið og bestu fréttir sem við getum gefið nokkrum manni því ekkert annað gefur manneskju jafn sterkan grunn til að þekkja sín mannréttindi og virða aðra sömuleiðis.

Íhugun og framkvæmd

  1. Hefur þú hugleitt áhverju virði manneskju og þar með mannréttindi eru byggð? Notaðu tækifærið og spurðu aðra að því á hverju mannréttindi byggjast og hlustaðu hverju fólk svarar.
  2. Ef þú er kristinn, æfðu þig þá í að útskýra fyrir öðrum af hverju fagnaðarerindið er bestu fréttirnar.

Smelltu á hnappinn hér fyrir neðan til að hlusta/horfa á Ágúst Valgarð Ólafsson predika um þetta efni.

Ekki flýja

Skrifað af Þorsteinn Jóhannesson. Posted in Pistlar

Spámaðurinn Elía er einn af þessum miklu guðsmönnum sem Biblían talar um en það var hann sem skoraði á 850 falsspámenn að sanna hver tryði á hinn sanna Guð með því að sá Guð sem myndi kveikja í fórn væri hinn sanni Guð. Falsspámennirnir báðu til sinna falsguða og ekkert gerðist en allmáttugur Guð kveikti í fórn Elía fyrir bæn hans. Það var líka Elía sem bað til Guðs að gefa rigningu eftir þriggja ára þurrkatímabil og það fór að rigna. En einungis sólahring eftir að Elía hafði upplifað þessi kraftaverk þá fyllist hann miklum ótta og flýði sökum þess að hann fékk þau skilaboð frá drottningu Ísraels að hún muni sjá til þess að hann yrði drepinn. Það var eins og hann gleymdi allt í einu að Guð var með honum, að hann var þjónn Guðs og sem slíkur undir verndarvæng hans. Elía flýði án þess að biðja eða ráðfæra sig við Guð og hann virðist hafa gleymt því að eina takið sem óvinurinn getur haft á Guðs fólki er tak ótta og hræðslu.

Sem Kristnir einstaklingar þá erum við undir verndarvæng Guðs en það getur komið fyrir, eins og með Elía, að Guð leyfi þær baráttur sem við lendum í vegna þess að Hann vill að þú lærir að standa gegn óvininum. Hann vill þjálfa þig í að standast. Þetta er allt liður í að undirbúa þig fyrir meiri þjónustu, meiri blessun og auka hæfileika þína í Guðs ríki. Guð er að styrkja þig gegn svikráðum óvinarins. Hann er að byggja upp trúaða sem hafa staðið gegn djöflinum og hafa styrk til að standa gegn honum. Einstaklinga sem þekkja vinnubrögð óvinarins og eru ekki hræddir við hann. En þegar óvinurinn fer á móti þér og þú finnur fyrir hræðslu þá þarft þú að hrista af þér hræðsluna í trú. Þú þarft að segja „Ég gefst ekki upp, Guð mun vernda mig og gefa mér það sem ég þarf. Hann mun nota mig“. Þú þarft að trúa því að Guð sé ekki hættur að nota þig, að Hann sé að kenna og þjálfa þig fyrir betri hluti? Guð vill tala við þig, kenna þér og segja hvað þú átt að gera og hvert þú átt að fara. Rístu upp og hristu af þér fjötra hræðslu og ótta. Rístu upp og treystu Guði og þú munt uppgötva að Guð er með þér og hefur áætlun fyrir líf þitt.

Íhugun og framkvæmd

  1. Hefur þú mætt einhverju á trúargöngunni sem hefur hrætt þig og þú hefur ekki upplifað að Guð væri með þér?
  2. Hvað óttast þú mest að mæta á trúargöngu þinni?
  3. Finnst þér þú vera að vaxa sem trúaður einstaklingur?

Smelltu á hnappinn hér fyrir neðan til að hlusta/horfa á Þorstein Jóhannesson predika um efni þessa pistils.

Páskar - Ríki Jesú er ekki af þessum heimi

Skrifað af Ágúst Valgarð Ólafsson. Posted in Pistlar

Jesús ríður á asna inn í Jerúsalem og fólkið fagnar. Páskahátíð gyðinga var að hefjast. En hvað höfðu þeir sem fögnuðu í huga? Jafnvel þeir sem þekktu Jesús best höfðu ranga sýn á hvað Jesús ætlaði sér að gera. Margir vonuðust til að Jesús myndi reka rómverjana út og endurreisa Ísrael sem sterkt veraldlegt ríki. Aðrir vildu sjá Jesús lækna alla sjúka og gefa öllum nægt brauð að borða.

En Jesús hefur aldrei passað inn í okkar veraldlegu hugmyndir um hann. Kirkjan á að vera líkami Jesú hér á jörðu, hendur hans og fætur. Sumar af verstu stundum kirkjunnar hafa verið þegar hún hefur þáð veraldlega upphefð og völd. Hefur blandað sér í stjórnmál og veraldarvafstur. Kirkjan á að einbeita sér að hjörtum fólks og að gera fólk að lærisveinum Jesú Krists. Ríki Jesú er ekki af þessum heimi þó það geti mótað þennan heim þegar Jesús er Drottinn í lífi okkar.

Við sem í huga okkar horfum á Jesú koma inn í Jerúsalem og fólkið fagna ættum að minnast þess að á eftir Pálmasunnudegi kemur krossinn. Krossinn er kjarni þess að fylgja Jesú. Sá sem fagnar Jesú verður að koma að krossinum til að kynnast því virkilega hver Jesús er. Sá sem velur sér “sinn eigin Jesú,” Jesús sem á að klára þann málstað sem ég hef mestan áhuga á, þarf að koma að krossinum og skilja sínar hugmyndir um réttlátan heim eftir þar. Gefa Jesú líf sitt og þiggja í staðinn nýtt hjarta frá honum, hjarta sem hefur gert Jesús að Drottni og meðtekið hann sjálfan, Jesús, sem réttlæti Guðs fyrir þennan heim. Það er bara ein leið til að það ríki friður og réttlæti í þessum heimi, að Jesús sé Drottinn.

Íhugun og framkvæmd

  1. Hvað finnst þér vera mesta óréttlætið á Íslandi? Hverju myndir þú breyta ef þú værir einræðisherra í einn dag á Íslandi?
  2. Hefur þú einhverntímann þurft að leiðrétta hugmyndir þínar um hver Jesús er?

Smelltu á hnappinn hér fyrir neðan til að hlusta/horfa á Helga Guðnason predika um þetta efni.

Velkomin(n) á póstlistann okkar.

Skylt efni

Hvítasunnukirkjan á Selfossi