Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Fyrirgefning er val

Skrifað af Dagbjört Eiríksdóttir. Posted in Pistlar

Flestir vilja að lífið gangi vel. Við viljum sem minnst af depurð, sorg og sársauka en sem mest af friði, gleði og fullnægju í líf okkar. En veröldin sem við búum í er oft ósanngjörn. Oft sjáum við slæma hluti henda gott fólk. Hvernig eigum við að bregðst við þegar aðrir gera okkur illt hvort sem það er óvart eða af ásetningi? Jesús var mjög afdráttarlaus þegar hann kenndi að réttu viðbrögðin eru fyrirgefning.

Mat 6:14-15 Ef þér fyrirgefið mönnum misgjörðir þeirra, þá mun og faðir yðar himneskur fyrirgefa yður. (15) En ef þér fyrirgefið ekki öðrum, mun faðir yðar ekki heldur fyrirgefa misgjörðir yðar.

Rifrildi

Fyrirgefningin er einn lykilinn að blessun Guðs. Þegar Jesú dó á krossinum tók hann á sig allt rangt sem við höfum gert og gaf fyrirgefningu í eitt skipti fyrir öll.

Réttlæti eða miskunn?

Hefur þú lent í því að vilja miskunn og náð fyrir þig sjálfa(n) þegar þú brýtur gegn öðrum en krefjast svo réttlætis þegar brotið er gegn þér? Sá staður þar sem náð Guðs og blessun flæðir er þegar við fyrirgefum öðrum og gerum það að mynstri í lífi okkar. Á þessum náðarstað eigum við frið við alla menn, frelsi og hugarró. Þegar við veljum að stíga út úr þessum náðarstað veljum við dóm fram yfir miskunn, þar hefur óvinurinn aðgang að huga okkar og rænir okkur friði og frelsi

Fyrirgefning er val!

Lækur

Fyrirgefning opnar hjartað svo lækir lifandi vatns geti flætt óhindraði í lífi okkar. Innri sársauki, ófyrirgefning og biturleiki dregur úr okkur allan mátt og fangelsar. Skortur á fyrirgefningu rænir okkur friði, frelsi og sannri gleði.

Fyrirgefning er ekki að samþykkja það sem gert var á þinn hlut heldur að velja að losa viðkomandi undan dómi þínum svo að ÞÚ getir orði frjáls. Það getur verið erfitt val að fyrirgefa en Guð getur gefið okkur að vilja og framkvæma. Það sem virðist ómögulegt og ógerlegt er hægt með því að biðja Guð um hjálp. Vitur maður sagði eitt sinn: Að fyrirgefa ekki er líkt og að drekka eitur og vonast til að hinn aðilinn deyi. Veldu að fyrirgefa, þín vegna!

Jóhannes Hinriksson predikaði um fyrirgefninguna 14.ágúst 2016.

Dagbjört Eiríksdóttir

Sterkasta sönnunin um Guð

Skrifað af Ágúst Valgarð Ólafsson. Posted in Pistlar

Efast þú um tilvist Guðs? Finnst þér erfitt að trúa á tilvist ósýnilegs Guðs? Eða er erfitt að trúa á almáttugan og góðan Guð á sama tíma og við sjáum svona mikið illt í heiminum? Sterkasta sönnunin fyrir tilvist Guðs er einmitt sú staðreynd að við mennirnir getum spurt og rökrætt spurningar eins og þessar.

Hvít blóðfruma

Sjáðu til, ef það er enginn Guð til þá er öllu stjórnað af náttúrulögmálum. Reyndar má þá spyrja hvaðan náttúrulögmálin koma, en það er efni í annan pistil. Heimurinn er þá efni, efnahvörf og atburðir sem allt stjórnast af náttúrulögmálum og engu öðru. Segjum að ég sé að spjalla við kunningja minn að nafni Jón sem er sannfærður um að Guð sé ekki til. Í heimi Jóns er enginn Guð. Jón trúir því að hann sjálfur sé til vegna þess að einhvern veginn kviknaði líf á jörðinni (hann veit ekki hvernig). Fyrst var það e.t.v. einfrumungur. Þessi fruma þróaðist í einföld dýr sem svo þróuðust í fullkomnari dýr þangað til Jón loks fæddist. Allt þetta ferli og öll stig þess er 100% ákvarðað af náttúrulögmálum og náttúruvali. Þeir sterkustu lifa af og allt það. Ef Jón nú segir að uppáhalds liturinn hans sé rauður, þá er jafnvel það val hans einnig ákvarðað af náttúrulögmálum ekki satt? Auðvitað finnst honum að hann hafi sjálfstæða hugsun en það er aðeins tálsýn.

Ef heimurinn er ekkert nema efni, atburðir og náttúrulögmál, hvar er þá pláss fyrir raunverulega valkosti mannsins eða sjálfstæða hugsun? Jón er því í vissum vanda. Ef hann segir við mig: “Guð er ekki til” þá myndi ég spyrja hann á móti: “Viltu að ég taki þig alvarlega?”

Ef Jón játar þeirri spurningu er hann kominn í mótsögn við eigin heimssýn því í guðlausum heimi hefur maðurinn enga sjálfstæða hugsun eða valkosti því bókstaflega ÖLLU er stjórnað af náttúrulögmálunum. Það er EKKERT annað en náttúrulögmál og efni í guðlausum heimi.

Og auðvitað er ekki valkostur að svara spurningunni neitandi. Jón gerir réttilega ráð fyrir því að í eðlilegum samskiptum sé hann tekinn alvarlega og einmitt með því bendir líf hans á tilvist Guðs.


Það er rétt að taka það fram að þessi grein snertir á efni sem hefur verið mikið rætt: Hefur maðurinn frjálsan vilja? Það eru til margvísleg rök bæði hjá guðleysingjum og þeim sem trúa á tilvist Guðs. Heilt yfir finnst mér rökin hér að ofan þau mest sannfærandi sem ég hef séð en vil gjarnan heyra frá þér ef þú hefur innlegg í umræðuna.

Ágúst Valgarð Ólafsson

 

Opið fyrir alla

Skrifað af Ágúst Valgarð Ólafsson. Posted in Pistlar

Ég spjallaði við manneskju um daginn sem sagði við mig: Það að eiga góða vini hefur alltaf verið mér svo mikilvægt. Ég er svo þakklát(ur) fyrir að að eiga góða vini í dag. Þegar ég var barn átti ég ekki alltaf góða vini.

 Geta ekki allir tekið undir þetta? Við viljum vera meðtekin og viðurkennd af öðrum, við viljum fá að vera með.

Enginn hefur nokkurn tímann talað og kennt eins og Jesús frá Nasaret. Matteusarguðpjall kaflar 5-7 eru kallaðir fjallræðan. Jesús byrjar þessa ræðu á því sem hefur verið kallað sæluboðin og þau byrja á þessu: Sælir eru fátækir í anda, því að þeirra er himnaríki. Mat 5:3

Og þannig heldur Jesús áfram og segir m.a.

  • Sælir eru sorgbitnir
  • Sælir eru hógværir
  • Sælir eru þeir sem hungrar eftir réttlætinu
  • Sælir eru miskunnsamir
  • Sælir eru hjartahreinir
  • Sælir eru friðflytjendur
  • Sælir eru þeir sem ofsóttir eru fyrir réttlætis sakir
  • Sælir eruð þér, þá er menn smána yður

Hvað er Jesús að meina með þessu? Eitt má segja með öryggi: Jesús steig inn í þjóðfélag þar sem fólki var skipt upp í hópa, þar sem sumir voru “inni” en aðrir “úti” - og inn í þessar aðstæður byrjar Jesú fjallræðuna á sæluboðunum þar sem hann einfaldlega segir okkur að ríki Guðs er aðgengilegt fyrir ALLA sem vilja koma til hans.

Jesús valdi sér lærisveina úr ýmsum hópum þjóðfélagsins: Fiskimenn, tollheimtumenn og sumir voru jafnvel ungir menn sem vildu hefja vopnaða uppreisn gegn ríkjandi valdhöfum. Á meðan aðrir kennarar gyðinga völdu helst unga og vel gefna menntamenn frá Jerúsalem, þá valdi Jesús “venjulega” lærisveina. Jesús valdi fólk eins og mig og þig, venjulegt fólk.

Ef þú hefur upplifað sorg þá ert þú “inni” með Jesú. Sælir eru sorgbitnir. Ef þú hefur þráð réttlæti eftir að hafa horft upp á ranglæti þá ert þú “inni” með Jesú. Sælir eru þeir sem hungrar eftir réttlætinu. Allir þeir sem vilja fylgja Jesú eru “inni” (sælir) með honum því við höfum öll upplifað þá hluti sem Jesú telur upp í sæluboðunum.

Við þráum öll að vera meðtekin og eiga góðan vin. Það er vegna þess að Guð hannaði okkur til samfélags bæði við sig og aðra. Þess vegna upplifum við tómarúm innra með okkur þangað til sál okkar finnur heimili sitt hjá Guði.

Seinna í Matteusarguðspjalli segir Jesús: Komið til mín, allir þér sem erfiði hafið og þungar byrðar, og ég mun veita yður hvíld. (29) Takið á yður mitt ok og lærið af mér, því að ég er hógvær og af hjarta lítillátur, og þá munuð þér finna hvíld sálum yðar. Mat 11:28-29

Allir geta komið til Jesú - og Jesús hvetur okkur til þess með því að segja: Komið til mín. Það eina sem getur virkilega hindrað okkur í að koma til Jesú erum við sjálf. Eina leiðin til að koma til Jesú er að gefast honum og viðurkenna að hann sé Drottinn eða sá sem með réttu ætti að vera leiðtoginn í lífi okkar. Þess vegna upplifa margir eins og togað í sig úr tveim áttum: Annars vegar er löngunin til að tengjast góðum Guði sem elskar okkur óendanlega mikið. Hins vegar er tregðan til að gefa upp forystuna yfir eigin lífi. Ef þú finnur löngun til að tengjast Jesú en finnst það erfitt þá vil ég hvetja þig til að setjast niður í einrúmi og tala við hann, eins eðlilega og blátt áfram og þú getur. Segðu honum hvað þér finnst erfitt og biddu hann um hjálp. Þetta getur verið fyrsta skrefið á löngu ferðalagi með honum sem verður fullt af friði og kærleika.

Það ferðalag að tengjast Guð gengur best ef við höfum góða ferðafélaga.

Ágúst Valgarð Ólafsson

Velkomin(n) á póstlistann okkar.

Skylt efni

Hvítasunnukirkjan á Selfossi