Dögg Harðardóttir
Hjúkrunarfræðingur
Aðrar upplýsingar
Dögg Harðardóttir er fædd 1965. Hún er hjúkrunarfræðingur að mennt auk þess að hafa kennsluréttindi á framhaldsskólastigi. Hún lauk B.Sc. námi í hjúkrunarfræði frá Háskóla Íslands 1992, uppeldis- og kennslufræði frá Háskólanum á Akureyri árið 2000 og 60 ECTS diplómanámi í heilbrigðisvísindum með áherslu á stjórnun frá Háskólanum á Akureyri 2011. Hún hefur starfað innan heilbrigðisþjónustunnar í Reykjavík, á Akureyri og Húsavík, auk kennslu í grunn- og framhaldsskólanum á Húsavík. Hún er núna deildarstjóri augndeildar Landspítalans.
Dögg hefur átt sæti í stjórn Hvítasunnukirkjunnar í Reykjavík og á Akureyri, verið formaður Aglow þverkirkjulegra kvennasamtaka, verið formaður og stjórnarmaður í Gídeonfélaginu, verið varaforseti Hins íslenska biblíufélags, verið formaður félagsins Nemendur og trú, skrifað greinar fyrir tímaritið Bjarma, verið dagskrárgerðarmaður á útvarpsstöðinni Lindinni, verið foringi í sumarbúðum KFUM, tekið þátt í barna- og unglingastarfi í Reykjavík, á Akureyri og í Húsavíkurkirkju. Hún hefur gefið út bækurnar Arfur konunnar og Bænabók auk Daggardropa á geisladiskum, en það eru stuttar hugleiðingar um lífið og tilveruna út frá Biblíunni. Þá átti hún sæti í Stjórnlagaráði og í nefnd á vegum Akureyrarbæjar sem vann að endurbættri mannauðsstefnu bæjarins.
Dögg er gift Fjalari Frey Einarssyni, kennara og eiga þau synina Einar Aron og Jóel.
