Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Frelsi frá fíkn og brestum

Skrifað af Þorsteinn Jóhannesson. Posted in Pistlar

Einstaklingar sem eru á valdi fíknar velja sumir að fara í 12 spora kerfi í von um lausn og margir sem vinna sporin af einlægni finna þar lausn. En það sem 12 spora kerfi kenna fólki er að ef það vill sjá breytingu í lífi sínu þá þurfi það að átta sig á og viðurkenna að það þarf hjálp, þau geta ekki breytt sér í eigin mætti en með hjálp æðri máttar geta þau losnað.

Þetta er sama vandamál sem við stöndum frammi fyrir ef við viljum vaxa sem kristnir einstaklingar, við getum ekki gert það í eigin mætti, við þurfum hjálp. Við þurfum Guðs hjálp til að losa okkur við brestina.

Fyrsta skrefið er að gefa líf sitt Jesú og biðja hann að fyrirgefa okkur syndirnar. Hann fyrirgefur okkur syndirnar og við upplifum að við erum frjáls. En þrátt fyrir það þá eru oft ýmsir brestir í lífi okkar sem geta hindrað okkar andlega vöxt. Þetta geta verið brestir eins og minnimáttarkennd, skapbræði, stjórnsemi, langrækni. Brestir sem eru ekki að hjálpa okkur í að verða þær manneskjur sem Guð hefur ætlað okkur að verða. Þess vegna þurfum við að vinna í því að losna við við brestina, við þurfum að eiga daglegt samfélag við Jesú þar sem við biðjum til hans og lesum í Biblíunni.

Við þurfum líka að fyrirgefa þeim sem hafa gert eitthvað á okkar hlut og við þurfum líka að sættast við þá sem við höfum brotið á (Kól 3:13; Matt. 5:23-24 ).

En við þurfum líka að hafa í lífi okkar einhvern einstakling sem við treystum og getum sagt frá syndum okkar (Jak 5:16) en Biblían segir að það sé svo að við getum verið frjáls. Ég var búinn að vera kristinn í 20 ár þegar ég áttaði mig á því að ég var að glíma við bresti sem voru ekki að hjálpa mér að verða betri maður og í kjölfarið fór ég í vinnu þar sem ég játaði syndir mínar fyrir trúnaðarvini sem ég treysti en ég vann líka markvisst í því að fyrirgefa þeim sem höfðu gert eitthvað á minn hlut. Einnig fór ég til einstaklinga sem ég hafði gert eitthvað gegn og bað þá að fyrirgefa mér. Ég hafði tekið á móti Jesú 20 árum áður. Þarna þar sem ég var rúmlega fertugur upplifði ég á þessum mánuðum, meðan ég vann markvist í þessu, meiri breytingu í mínu lífi til hins betra en ég hafði þessi 20 ár sem ég hafði trúað á Jesú.

Málið er að við verðum markvist að vinna að því að verða þær manneskjur sem Guð vill að við séum. Ef við gerum ekki neitt þá gerist ekki neitt. Í öllu sem við gerum, ef við viljum sjá árangur, verðum við að leggja eitthvað á okkur og þannig er það einnig með okkar trúargöngu ef við viljum ná einhverjum árangri þá kostar það vinnu af okkar hendi.

Íhugun og framkvæmd

  1. Hvaða son í sögunni um týnda soninn tengir þú betur við (Lúk. 15:11-32)?
  2. Af hverju getum við átt erfitt með að viðurkenna bresti okkar?
  3. Í Jakobsbréfinu 5:16 er talað um að við eigum að játa syndir okkar hvert fyrir öðru. Hefur þú upplifað lækninguna sem kemur þegar maður játar fyrir annari persónu? Gætir þú sagt frá reynslu þinni af þessu?
  4. Óvinurinn vill hindra að við verðum þær manneskjur sem Guð vill að við séum. Ein leið sem hann notar er að fá okkur til að trúa lygi um hver við erum. Hvaða lygar geta það verið og hvernig losnum við undan þeim?

Smelltu á hnappinn hér fyrir neðan til að hlusta/horfa á Þorstein Jóhannesson predika um efni þessa pistils.

Laus frá girnd

Skrifað af Þorsteinn Jóhannesson. Posted in Pistlar

Á síðustu tuttugu og fimm árum hafa nokkrir forstöðumenn í frjálsum söfnuðum hér á landi orðið að hætta forstöðu sökum framhjáhalds þeirra eða maka þeirra. Í öllum tilvikum hafði þetta þau áhrif að söfnuðirnir löskuðust.

Hvað veldur því að fólk sem okkur finnst að ætti að vita betur gerir svona hluti? Biblían svarar því þannig að „Það er eigin girnd, sem freistar sérhvers manns og dregur hann og tælir. Þegar girndin síðan er orðin þunguð, elur hún synd, og þegar syndin er orðin fullþroskuð, fæðir hún dauða.” (Jak. 1:14-15).

Ég er viss um að þessir forstöðumenn eða makar þeirra ætluðu aldrei að halda framhjá en eitthvað varð til þess að þeir fjarlægðust Guð og hleyptu girndinni að sem varð að lokum til þess að þeir héldu framhjá.

Jesús kenndi okkur í faðirvorinu að við ættum að biðja „Gef oss í dag vort daglegt brauð”, hann kenndi ekki að við ættum að biðja um vikulegt brauð eða mánaðarlegt, þannig að ef við viljum standast þá þurfum við daglega að biðja og við þurfum daglega að lesa í Biblíunni.

En við þurfum líka að forðast það sem við vitum að hefur ekki góð áhrif á okkur. Ef það er eitthvað sem við horfum á sem gerir okkur ekki gott þá verðum við að hætta að horfa á það. Ef það er persóna sem hefur slæm áhrif, þá hætta að umgangast hana. Hvað sem það er sem getur valdið því að við gerum rangt þá eigum við að láta það eiga sig og ef ekkert annað dugir þurfum við að flýja, eða eins og Biblían segir „Flýið saurlifnaðinn!” (1 Kor 6:18).

Ef þú hins vegar upplifir að girndin sæki að þér og þú ert alltaf að falla fyrir því sama og hversu mikið sem þú reynir þá getur þú ekki hætt að girnast, þá getur verið að þú sért bundinn. Ef svo er þá er samt til lausn sem felst í að þú þarft að játa syndir þínar fyrir Jesú og biðja hann að fyrirgefa þér. En þú þarft líka að játa fyrir einhverri manneskju sem þú treystir og fá aðra trúaða til að standa með þér í bæn fyrir þér að þú losnir undan girndinni (Jak. 5 14-16), og trúarbænin mun gera þig frjálsan.

Íhugun og framkvæmd

  1. Sumir upplifa óánægju með sumt af því sem Guð hefur gefið þeim eins og vinnu, hjónabandið, fjármálin, vinina og svo framvegis. Hvernig hefur þú farið að við að hertaka svona hugsanir og velja æðruleysi og ánægju? 
  2. Hvernig hefur þú upplifað kærleika Jesú gagnvart þér?
  3. Hver er lykillinn að því að sigrast á girndinni samkvæmt Róm. 8:13 og hvernig hjálpar Heilagur Andi okkur við það? Því að ef þér lifið að hætti holdsins, munuð þér deyja, en ef þér deyðið með andanum gjörðir líkamans, munuð þér lifa (Róm. 8:13).
  4. Hvernig þekkjum við munin á heilbrigðri löngun eða girnd sem er gefin af Guði eða spilltri girnd. Lesið eftirfarandi vers áður en þið svarið spurningunni: Orðskv.10:24, Lúkas 22:15, Títus 2:12, 2 Tím. 2:22

Smelltu á hnappinn hér fyrir neðan til að hlusta/horfa á Þorsteinn Jóhannesson predika um efni þessa pistils.

Gjafir eða græðgi

Skrifað af Ágúst Valgarð Ólafsson. Posted in Pistlar

Hvað er græðgi? Í stóru orðabókinni um íslenska málnotkun eru dæmin fégræðgi, matgræðgi, landagræðgi, valdagræðgi og lífsþægindagræðgi. Robert Morris sagði: Græðgi er að hafa allt sem þú þarft og vilja meira.

Í seríunni „Frelsið er yndislegt” skoðum við hvað getur skaðað frelsi okkar. Græðgi er eitt af því. Sá sem vill eyðileggja líf okkar, Satan, getur notað græðgi til að setja okkur í hlekki.

Jesús talaði um eignir og fjármál í 16 af þeim 38 dæmisögum sem eru í NT. Það hefði hann ekki gert nema af því að þetta er mikilvægt efni. Ein af þessum dæmisögum er í Lúk 12:13-21:

Einn úr mannfjöldanum sagði við hann: „Meistari, seg þú bróður mínum að skipta með mér arfinum." (14) Hann svaraði honum: „Maður, hver hefur sett mig dómara eða skiptaráðanda yfir ykkur?" (15) Og hann sagði við þá: „Gætið yðar, og varist alla ágirnd. Enginn þiggur líf af eigum sínum, þótt auðugur sé." (16) Þá sagði hann þeim dæmisögu þessa: „Maður nokkur ríkur átti land, er hafði borið mikinn ávöxt. (17) Hann hugsaði með sér: ,Hvað á ég að gjöra? Nú get ég hvergi komið fyrir afurðum mínum.' (18) Og hann sagði: ,Þetta gjöri ég: Ég ríf hlöður mínar og reisi aðrar stærri, og þangað safna ég öllu korni mínu og auðæfum. (19) Og ég segi við sálu mína: Sála mín, nú átt þú mikinn auð til margra ára, hvíl þig nú, et og drekk og ver glöð.' (20) En Guð sagði við hann: ,Heimskingi, á þessari nóttu verður sál þín af þér heimtuð, og hver fær þá það, sem þú hefur aflað?' (21) Svo fer þeim er safnar sér fé, en er ekki ríkur hjá Guði."

Þetta „Seg þú bróður mínum…” í v13 minnir á barn sem segir „Mamma! Segðu Sigga að skila bílnum mínum!” Miðað við söguna sem Jesús segir í kjölfarið þá var þessi krafa um skipti arfsins knúin af græðgi. Jesús segir: Mitt verkefni er ekki að skipta eignum, mitt verkefni er að bjarga sál þinni.

Land ríka mannsins ber mikinn ávöxt (v16), greinilega meiri uppskera en gert hafði verið ráð fyrir. Vandamálið er hvar á að koma allri þessari uppskeru fyrir. Rökin eru að því meira af eignum og fjármunum sem hann eigi, því lengur og betur geti sál hans hvílt sig, etið, drukkið og verið glöð (v19). Eða í stuttu máli: Því meira gull => Því meiri sálarfriður. Jesús kallar þetta heimsku (v20).

Aðalmálið hér er sál ríka mannsins, ekki eignir hans. Guði er umhugað um sál hans og því hefði hann viljað sjá hann gefa af eigum sínum. Í staðinn verða eignir hans til þess að eyðileggja og binda sál hans. Hann valdi græðgi í stað gjafa og sál hans galt fyrir.

Okkur er falið að sjá um sál okkar en svo kemur að því að hún verður heimt af okkur og þá er spurt: Hvert er ástandið á sáli þinni? Hver er staðan á sál þinni? Það sem situr eftir eru ekki eignir heldur sál okkar. Sál okkar er það eina eilífa sem við höfum ráðsmennsku með. Með því að gefa reglulega forðum við því dýrmætasta sem við eigum undan græðgi: Sál okkar. Græðgi skaðar sál okkar og er opnar dyr fyrir óvininn.

Íhugun og framkvæmd

  1. Finnst þér erfitt að gefa? Ef svo er, hvað er það sem er erfitt við að gefa?
  2. Hvað finnst þér um það að sál þín sé það dýrmætasta sem þér hefur verið falin ráðsmennska með?
  3. Gott ráð til að forða sál okkar frá græðgi er að gefa reglulega og þannig að það telji. Hvað finnst þér um það og er eitthvað sem þú ætlar að gera öðruvísi í lífi þínu eftir að haga íhugað þetta efni?

Smelltu á hnappinn hér fyrir neðan til að hlusta/horfa á Ágúst Valgarð Ólafsson predika um efni þessa pistils.

Velkomin(n) á póstlistann okkar.

Skylt efni

Hvítasunnukirkjan á Selfossi