Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Að gefa

Skrifað af Kolbrún Berglind Grétarsdóttir. Posted in Pistlar

Til eru sagnfræðilegar staðreyndir um að Jesús gekk hér um á jörðinni. Guð valdi að senda okkur Jesú m.a. til að kenna okkur hvernig við gætum lært að elska fólk og gera öðrum gott. Það er talað um að við líkjumst þeim sem við umgöngumst. Ef við veljum að verja daglega tíma með Jesú þá komum við til með að líkjast honum meira og okkur reynist auðveldara að gera það sem hann gerði.

Að gefa

Þetta kallast vöxtur og heilbrigði. Fylgjendur Jesú eru fætur hans og hendur hér á jörð og þeim hefur verið treyst til að framkvæma það sem Guði liggur á hjarta gagnvart fólki. Það sem býr í hjarta okkar mótar það og af þvi gefum við til annarra. Ef hjarta okkar er fullt af kærleika Guðs gefum við kærleika Guðs áfram til annarra. Ef hjarta okkar er fullt af ást á veraldlegum eignum og dauðum hlutum þá höfum við lítið að gefa öðrum.

Gefum af okkur til að breiða út kærleika Guðs

Notaðu hvert tækifæri til að blessa fólk. Hafðu í huga að allar manneskjur hafa þörf fyrir blessun og uppörvun. Hvern getur þú uppörvað í dag? Gefðu líka af þér til kirkjunnir þinnar og ef þú sækir ekki kirkju reglulega prófaðu að mæta í nokkur skipti og þú munt finna líf þitt breytast til meiri hamingju, þér og öðrum til ómældrar blessunar.

Gefum af fjármunum okkar til að kirkjan geti breitt út ríki Guðs

Þetta reynist mörgum erfitt en ef við viljum að fólk fái að kynnast Jesú, eins og við höfum fengið að kynnast honum, þarf kirkjan fjármagn. Sitjum ekki ein að því að koma saman í kirkjunni og fá blessun og uppörvun. Gefum til að aðrir fái að eignast.

Gefum af eigum okkar til að við séum ekki þrælar heldur frjáls

Öll viljum við eiga gott líf og það er eðlileg þörf. En hversu gott þarf gott að vera og versu mikið er nóg? Lífsgæði okkar, í hvaða mynd sem er, ættu alltaf að stjórnast af því sem er í hjarta okkar því þaðan kemur hver við raunverulega erum. Fyllum ekki líf okkar af endalausum óþarfa sem gerir ekkert annað en að hneppa okkur í þrældóm sýndarmennsku og græðgi. Temjum okkur heldur að vera nægjusöm og gefa af okkur og með okkur. Þannig verður heimurinn betri

Höfundur: Kolbrún Berglind Grétarsdóttir

Þessi pistill er hluti af predikunarseríu sem heitir Af heilum hug

Til umræðu eða íhugunar

  1. Hversu auðvelt átt þú með að koma auga á þarfir annarra og bregðast við þeim?
  2. Hversu auðvelt átt þú með að gefa af fjármunum þínum?
  3. Hvernig gengur þér að losa þig við hluti sem þú notar ekki lengur?

Í bókinni "Af heilum hug" eru mjög góð verkefni og spurningar úr þessu efni. Bókina er hægt að nálgast í flest öllum Hvítasunnukirkjum. Sendu okkur línu ef þig vantar eintak eða komdu í heimsókn.

Hlusta á kennslu

Hópar

Skrifað af Gunnhildur Stella Pálmarsdóttir. Posted in Pistlar

Í stóra samhenginu er ótrúlega mikilvægt að tilheyra hópi. Hópar sem maður tengist geta haft góð áhrif og þeir geta líka haft slæm áhrif. Þú getur átt vini sem hafa góð áhrif á líf þitt og þú getur líka átt „vini“ sem hafa ekki góð áhrif á líf þitt.

Hópar

Það að tilheyra heimahópi hefur haft mótandi áhrif á mitt líf. Það er frábært að eiga aðgang að hópi vina sem vilja hjálpa mér að vaxa til að verða betri einstaklingur. Í góðum heimahópi lærir maður að ástunda óeigingirni og kærleika. Maður lærir að sýna öðrum samúð og samhug.

Ég hef gengið í gegnum erfiða tíma og þurft hvatningu og styrk. Þá er óendanlega dýrmætt að hafa sterkan, kristinn vinahóp sem stendur með manni með því að hlusta, biðja og uppörva. Í heimahópi lærir maður að láta sér þykja vænt um aðra og læra af reynslu annara og deila reynslu annara.

Við höfum öll breyskleika, galla og hluti sem við þurfum að vinna í í lífi okkar og heimahópur er ótrúlega góður staður til að fá að vaxa.

Þú getur heillað fólk með hæfileikum þínum en þú tengist fólki í gegnum veikleika þína.

Maður nær ekki fullum andlegum þroska bara á því að mæta á samkomur og vera óvirkur áhorfandi. Eitt af stóru verkfærunum í því að vaxa andlega er þátttaka í heimahópi. Þú hefur bakgrunn og reynslur sem annað fólk getur lært af og fengið styrk af. Guð hefur einstakt hlutverk fyrir þig í fjölskyldu Guðs. Guð hefur þjónustu fyrir þig og Guð hefur gefið þér hæfileika. Heimahópur er staður sem Guð gefur okkur til að uppgötva, móta og nota andlegar gjafir okkar og hæfileika.

Kæri lesandi. Ef þú tilheyrir ekki heimahópi þá hvet ég þig til að taka skrefið í dag. Hafðu samband við leiðtoga í kirkjunni þinni og veldu það að vera með. 

Höfundur: Gunnhildur Stella Pálmarsdóttir. Þessi pistill er hluti af predikunarseríu sem heitir Af heilum hug

Til umræðu eða íhugunar

  1. Hvað finnst þér jákvætt við tilheyra heimahópi? 
  2. Hvað óttaðist þú við að vera með í heimahópi? 
  3. Hvernig getur þú boðið öðrum að taka þátt í heimahópi? 

Í bókinni "Af heilum hug" eru mjög góð verkefni og spurningar úr þessu efni. Bókina er hægt að nálgast í flest öllum Hvítasunnukirkjum. Sendu okkur línu ef þig vantar eintak eða komdu í heimsókn.

Hlusta á kennslu

Æfingin skapar meistarann

Skrifað af Þorsteinn Jóhannesson. Posted in Pistlar

Ástundun er nauðsynleg í öllu því sem við viljum ná árangri í til dæmis atvinnu, hlaupa maraþon, læra á hljóðfæri og svo framvegis en hvað með trúargöngu okkar? Er ekki nóg að Jesús fyrirgefi okkur syndir okkar? Þurfum við eitthvað að breytast? Þurfum við eitthvað að vaxa í trúnni?

Æfingin skapar meistarann

Í Efesusbréfinu 4:15 segir að við eigum að „vaxa í öllu upp til hans, sem er höfuðið, Kristur“. Með öðrum orðum þá er vaxtarmarkmið okkar að líkjast Jesú og það verður ekki nema með ástundun og þjálfum. Það er mikilvægt að skilja að þótt trúarleg þjálfun krefjist aga af okkar hendi, við verðum jú að gefa af tíma okkar, þá getur þjálfunin og sannarlega ávextir hennar verið ánægjuleg veitir okkur meiri lífsfyllingu. Við erum jú að æfa okkur í að nálgast Guð sjálfan sem er uppspretta alls þess sem er gott, góðra tilfinninga, gleði og ánægju. Það eru nokkrar æfingar sem eru nauðsynlegar og þurfa að vera í lífi okkar til að við náum að vaxa eðlilega.

Það fyrsta er að lesa og hugleiða ritninguna (Biblíuna). Jesús gekk út frá því að Biblían segði til um hver Hann væri og að Hann væri kominn til að uppfylla ritningarnar. Jesús vitnaði til ritninganna varðandi hvað væri rétt og rangt. Fyrst Jesú trúði ritningunum og byggði þjónustu sína á þeim þá þurfum við einnig að gera það og til þess þurfum við að lesa í Biblíunni. Við þurfum að gera það reglulega á hverjum degi til að við vitum vilja Guðs og lærum að þekkja hann betur.

Einvera og bæn er önnur æfing sem við verðum að ástunda. Jesús leitaðist sífellt eftir því að fara afsíðis til að eiga samfélag við Guð. Hann leitaði í einveruna, bænina og samfélagið við Guð. Þetta þurfum við líka að gera, við verðum að eiga stundir ein í bæn með Guði þar sem er ekkert áreiti og þar sem við getum beðið það sem er á hjarta okkar og hlustað eftir því hvað Guð hefur við okkur að segja. Á þessum stundum lærum við að þekkja röddu Guðs og fáum leiðbeiningu hans.

Við þurfum að vera í samfélagi við annað trúað fólk til að við getum vaxið. Til að við getum vaxið þurfum við að sleppa hlutum sem hindra vöxt. Þessir hlutir geta verið margvíslegir brestir eins og óreiða í fjármálum, áhyggjur, skapgerðabrestir, ótti, vanmáttur, stjórnleysi og allt sem á einhvern hátt getur bundið okkur. Guð vinnur þannig að hann vill hreinsa okkur til að við getum vaxið meira. Hann gefur okkur anda sinn til leiðbeiningar, huggunar og visku. En hann gefur okkur annað fólk til að styðja okkur og leiðbeina. Í Jakobsbréfi 5:16 stendur, „Játið því hver fyrir öðrum syndir yðar og biðjið hver fyrir öðrum, til þess að þér verðið heilbrigðir,, Til þess að við getum verið andlega heilbrigð þá þurfum við á hvert öðru að halda.

Höfundur: Þorsteinn Jóhannesson. Þessi pistill er hluti af predikunarseríu sem heitir Af heilum hug

Til umræðu eða íhugunar

  1. Ert þú að lesa í Biblíunni? Hvenær og hvernig lest þú?
  2. Átt þú stundir í einveru og bæn (lýstu)? .
  3. Átt þú kristinn trúnaðarvin og ástundar þú það sem Jakobsbréfið 5:16 boðar?

Í bókinni "Af heilum hug" eru mjög góð verkefni og spurningar úr þessu efni. Bókina er hægt að nálgast í flest öllum Hvítasunnukirkjum. Sendu okkur línu ef þig vantar eintak eða komdu í heimsókn.

Hlusta á kennslu

Velkomin(n) á póstlistann okkar.

Skylt efni

Hvítasunnukirkjan á Selfossi