Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Stormþétt líf

Skrifað af Ágúst Valgarð Ólafsson. Posted in Pistlar

Ég hef upplifað nokkur íslensk óveður. Það eftirminnilegasta skall á í febrúar 1992. Eiríkur á Gafli hringdi í pabba og sagði: „Hér er allt eins og eftir lofárás!” Vélaskemman hans Eiríks hafði bókstaflega tekist á loft í einni hviðunni og tæst í sundur svo brakið dreifist í allar áttir. Jafnvel skiltið heim að bænum hafði lagst út af í rokinu, ég tók mynd af því þegar við heimsóttum Eirík daginn eftir.

Stormþétt líf

Íslendingar vita að það koma óveður öðru hverju og byggja því yfirleitt sterk og traust hús. Skemman hans Eiríks hafði dugað mörg óveður áður en hún mætti ofjarli sínum í þessu ofsaveðri árið 1992. E.t.v. höfðu festingarnar við grunninn ryðgað í sundur eða skemman verið illa byggð í upphafi.

Líf okkar lenda líka í stormum og það getur blásið hressilega í óvæntum óveðrum. Það er erfiðara að spá fyrir um storma lífsins heldur en íslensku óveðrin.

Þetta vissi Jesús og hann notaði þessa líkingu um storma þegar hann útskýrði hversu mikilvægt það er að heyra ekki bara orð hans heldur bæði heyra og framkvæma. Þessa frásögn má finna í Mat 7:24-27.

Það er auðvelt að telja sér trú um að það sé nóg að vita hlutina, þá séum við með allt á hreinu. En það ER ekki nóg. Að heyra án þess að framkvæma er eins og að hræra í skúffuköku en setja hana aldrei í ofninn.

Sá sem er lærisveinn Jesú mun eignast stormþétt líf sem enginn jarðneskur stormur fær hróflað við, líf án ótta. Vilt þú eiga djúpa fullvissu um að ekkert geti raunverulega skaðað þig svo að það bíti?

Jesús meinti hvert einasta orð sem hann sagði. Hann ætlaði þessu ekki að vera falleg orð á bleikum skýjum heldur raunsönn lýsing á ástandi okkar og lausn á því: Að gerast lærisveinar hans. Þetta útheimtir í grunninn þrennt:

  1. Taka inn orð hans og æfa sig í að framkvæma þau.
  2. Leggja sig fram um í einhverri mynd að fleiri fái að kynnast Jesú.
  3. Gera þetta tvennt hér fyrir ofan í samfélagi með öðrum. Hleypa traustu fólki að lífi sínu, játa syndir sínar (Jak 5:16) og vinna að því saman að vera lærisveinar Jesú.

Stormþétt líf er í seilingarfjarlægð fyrir alla þá sem af fullri alvöru gerast lærisveinar Jesú. Hann er þetta bjarg sem ekkert jarðneskt fær hróflað við og hann sannaði það með því að rísa upp frá dauðum.

Ef þú vilt vita meira um það að vera lærisveinn hlustaðu þá á predikunina sem þessi pistill byggir á.

Íhugun og framkvæmd

  1. Lestu og rannsakaðu Mat 7:24-27. Skrifaðu niður allt sem er líkt við þessa tvo menn og svo það sem er ólíkt. Sem dæmi, þeir voru báðir að byggja (líkt), bæði húsin lentu í stormi (líkt).
  2. Mat 7:24-27 - Skrifaðu niður hvað Jesú segir um það þegar einhver heyrir orð Guðs, t.d. í predikun eða við lestur, en gerir ekkert með það í lífi sínu. Hvaða lýsingarorð notar Jesú um þann sem heyrir en framkvæmir ekki?
  3. Hefur þú tekist á við ótta og streitu í þínu lífi? Hvernig væri líf þitt öðruvísi ef það væri laust við ótta?
  4. Hér fyrir ofan er talið upp þrennt sem þarf að vera til staðar fyrir lærisveina. Þessu er nánar lýst í predikuninni. Hversu vel eru þessi 3 atriði til staðar í þínu lífi? Ef þörf er á, ert þú tilbúinn að bæta úr því sem vantar?

Höfundur: Ágúst Valgarð Ólafsson

Þessi pistill er hluti af predikunarseríu sem heitir Farið, gerið, skírið og kennið Ef þessi orð byggðu þig upp þá smelltu á Deila hér fyrir neðan til að fleiri byggist upp.

Stormþétt líf

Að fara út með fagnaðarerindið

Skrifað af Þorsteinn Jóhannesson. Posted in Pistlar

Samkvæmt Biblíunni var Davíð maður eftir Guðs hjarta, en þrátt fyrir það þá varð honum illilega á. Hann féll í það að girnast og sofa hjá konu annars manns og til að hylma yfir þá lét hann drepa manninn. En hvað olli því að maður eftir Guðs hjarta féll svona svakalega?

Að fara út með fagnaðarerindið

Biblían segir að í stað þess að fara fyrir hernum í bardaga þá hafi Davíð setið heima hjá sér og látið aðra um að leiða herinn og í þeim kringumstæðum hafi hann fallið. Hlutverk Davíðs sem konungs var að fara fyrir og ef þjóðin var í bardaga þá átti hann að fara þar fyrir. En af einhverjum orsökum gerði hann það ekki og líklega var það hluti af ástæðunni fyrir því að hann féll.

En hvað með okkur sem kristnir einstaklingar? Við vitum að við þurfum að biðja og lesa og eiga samfélag við aðra kristna til að rækta trú okkar en hvað með það að segja öðrum frá?

Jesús var mjög skýr á því að við ættum að fara út segja öðrum frá honum! Davíð var í hernaði en það erum við líka, við erum í andlegum hernaði og til að við getum staðist þá þurfum við að segja frá. Ef við gerum það ekki þá verðum við eins og vatn sem bara flæðir í, sem staðnar og síðan fúlnar. Við getum ekki bara þegið, við verðum líka að gefa og við gefum með því að hlýða Jesú og fara út og segja öðrum frá.

Margir treysta sér ekki til að ræða fagnaðarerindið við aðra, sérstaklega ekki ókunnuga. En allir geta gert eitthvað, t.d. bjóða öðrum með sér á viðburð þar sem fagnaðarerindið er flutt með einhverjum hætti.

Íhugun og framkvæmd

  1. Í 2 Samúelsbók 11:1–2, segir að Davíð var í Jerúsalem þegar konungar fóru í hernað. Hann sendi Jóab í sinn stað. Af hverju er svo mikilvægt að fara út þegar við eigum að fara út? Hver er hættan ef við gerum það ekki?

  2. Lestu Lúkas 14:15–24.

    2a Hvað stendur veislan fyrir í dæmisögunni?

    2b Í þessari dæmisögu gerir Jesús það ljóst að engar afsakanir eru gildar varðandi að taka þátt í veislunni með honum. Hvaða afsakanir heyrir þú eða gefur varðandi að nálgast hann þegar hann kallar?

    3b Í dæmisögunni sendir konungurinn út þjóna sína til að ná í aðra til að taka þátt í veislunni. Hvaða skilaboðum vill Jesú koma á framfæri til þeirra sem trúa á hann með þessari dæmisögu? 

  3. Hvað hugsar þú þegar þú heyrir orðið að vitna? Er hugsunin jákvæð eða neikvæð? Af hverju?

  4. Hvað þýðir að vitna í raun og veru?

  5. Hvernig eigum við að segja öðrum frá trú okkar? Hvað virkar á Íslandi í dag og hvað virkar ekki?

  6. Ef einhver leitaði ráða hjá þér varðandi hvort Guð væri að ýta á hann að segja einhverjum frá Jesú, en hann væri ekki viss um að Guð væri að ýta á hann, hvað myndir þú segja?

    Biddu Guð að minna þig á einstakling sem Hann vill að þú talir við um Jesú. Biddu Hann um að þú sjáir þennan einstakling á sama hátt og Guð sér hann. Biddu Guð um visku til að vita hvenær þú eigir að fara út og fylgja Hans leiðsögn. Biddu Guð að leiðbeina þér hvernig þú getur sagt öðrum frá á þann hátt að hjarta þeirra verði opið fyrir Honum.

Höfundur: Þorsteinn Jóhannesson

Þessi pistill er hluti af predikunarseríu sem heitir Farið, gerið, skírið og kennið

Allt vald er mér gefið

Allt vald er mér gefið

Skrifað af Ágúst Valgarð Ólafsson. Posted in Pistlar

Ég hef fullkomna stjórn á því hvernig sokka ég vel mér á morgnana. Öðru hef ég hins vegar oft lítið vald yfir eins og t.d. því ef við hjónin eigum að mæta einhversstaðar á tilteknum tíma!

Allt vald er mér gefið

Jesús sagði: Allt vald er mér gefið á himni og jörðu. Farið því … (Mat 28.18b-19a)

Orðin „Farið því” vísa í þetta algjöra vald og í því umboði sendir hann lærisveina sína til að gera aðra að lærisveinum. En er þá eitthvað sem fylgjendur Jesú þurfa að gera ef Jesús ræður öllu og hefur allt vald? Getur hann ekki bara kippt í þá spotta sem þarf á meðan við setjumst í sófann með poppskál og Netflix?

Auðvitað hefði Guð getað hannað heim þar sem mennirnir væru strengjabrúður en Guð tæki allar ákvarðanir og framkvæmdi allt sem máli skipti. En það er ekki sá heimur sem við lifum í.

Í sköpunarsögunni (1Mós 1.26-28) fól Guð manninum að vernda og ríkja yfir jörðinni og þannig hefur það verið síðan. Þetta umboð mannsins til að drottna yfir jörðinni var svo sterkt skilgreint að við syndafallið færðist það yfir til óvinarins. Það sem Guð hafði gefið manninum umboð yfir færðist til Satans við syndafallið. Satan býður Jesú þetta umboð til að freista hans:

Lúk 4:6 Og djöfullinn sagði við hann: „Þér mun ég gefa allt þetta veldi og dýrð þess, því að mér er það í hendur fengið, og ég get gefið það hverjum sem ég vil.”

En Jesús vann þetta umboð til baka á krossinum. Þess vegna m.a. getur hann sagt „Allt vald er mér gefið....”

Peter Wagner skrifaði: Við þurfum að skilja að alvaldur Guð hefur af eigin ástæðum hannað heiminn þannig að mikið af því sem sannarlega er hans vilji hefur hann gert háð viðhorfum og verkum manna. Guð leyfir manninum að taka ákvarðanir sem hafa áhrif á mannkynssöguna.

Við mennirnir erum því með ráðsmennsku yfir jörðinni í umboði og í valdi Krists. Eins og Guð sendi Jesú til jarðarinnar þá sendir Jesú okkur núna (Jóh 20.21).

Þegar Jesús segir okkur að fara og gera aðrar þjóðir að lærisveinum þá sannarlega er það á okkar ábyrgð og á okkar vakt. Þetta er mikil ábyrgð en jafnframt gríðarlegt tækifæri því við erum samverkamenn Guðs. Ef við biðjum af ástríðu og heilindum og fylgjum því eftir með verkum okkar og lífi mun Guð færa fjöll úr stað til að vilji hans með þjóðirnar verði að veruleika.

Íhugun og framkvæmd

  1. Nefndu dæmi um hluti sem þú hefur vald og ráðsmennsku yfir. Hlutir sem þú stjórnar. Ef þú gerir vel ganga þeir vel en ef þú tekur slæmar ákvarðanir þá fer illa.
  2. Var eitthvað í þessum pistli eða predikun sem fékk þig til að hugsa öðruvísi um hlutverk okkar í ríki Guðs?
  3. Eru einstaklingar sem þú þráir að taki trú á Krist? Ef þú ert í heimahóp þá takið tíma til að biðja fyrir þessum einstaklingum.

Höfundur: Ágúst Valgarð Ólafsson

Þessi pistill er hluti af predikunarseríu sem heitir Farið, gerið, skírið og kennið

Allt vald er mér gefið

Velkomin(n) á póstlistann okkar.

Skylt efni

Hvítasunnukirkjan á Selfossi