Á hverjum miðvikudegi birtist nýr pistill. Sendu okkur línu ef þú ert með hugmynd að pistli eða ef þú ert með spurningu sem mætti svara með pistli.

Frelsi frá fortíðinni

Skrifað af Ágúst Valgarð Ólafsson. Posted in Pistlar

Mér hefur aldrei fundist gaman að lita í litabækur. Í grunnskóla fann einhver út að láta mig lita í litabækur til að þjálfa fínahreyfingar fyrir fallegri rithönd. Þetta var mér kvöl og pína. Ég minnist þess að hafa setið með litabókina á gólfinu inni í herbergi og grátbeðið Guð um að ég fengi að losna við litabókina.

Svona atburðir geta fylgt okkur inn í fullorðinsár og mótað upplifun okkar af atburðum löngu síðar. Vanmetakennd, depurð, reiði, ofát, stjórnsemi og svo mætti lengi telja. Algengast er að þeir sem þjást af svona hlutum séu mótaðir þannig af æskunni.

Þetta ætti ekki að vera svona og flestir sem þjást svona, og vita af því, vilja losna. Þeir sem þjást og valda sínum nánustu þjáningum, en vita ekki af því, eru svo á enn erfiðari stað. En það er til lausn og hún byrjar á því að gefa gaum að Jesú. Markmið Jesú er að fjarlægja alla illsku úr veröldinni og afleiðingar hennar, lagfæra það sem hefur farið aflaga.

Í upphafi þjónustu sinnar las Jesús þessi orð upp í samkunduhúsinu í Nasaret, þar sem hann ólst upp:

(18) Andi Drottins er yfir mér, af því að hann hefur smurt mig. Hann hefur sent mig til að flytja fátækum gleðilegan boðskap, boða bandingjum lausn og blindum sýn, láta þjáða lausa (19) og kunngjöra náðarár Drottins. Lúk 4:18-19

Í stuttu máli: Jesús kom til að lagfæra það sem fer úrskeiðis.

Sá sem er bandingi er bundinn, vill losna en getur það ekki af sjálfsdáðum. Þetta er fólkið sem Jesús vill leysa. Mikilvægasta atriðið í lausn Jesú er fyrirgefningin. Jesús er fær um að fyrirgefa okkur því hann tók allt sem hefur farið úrskeiðis í þessum heimi upp á krossinn þar sem má segja að það hafi látið lífið með honum. Jesús réttir okkur þessa fyrirgefningu og segir okkur svo að rétta hana áfram til þeirra sem hafa valdið okkur skaða. Pétur spurði Jesús einu sinni hversu oft ætti að fyrirgefa öðrum: “svo sem sjö sinnum?” Jesús svaraði sjötíu sinnum sjö og sagði svo sögu af þjóni sem var ekki tilbúinn að gefa upp skuld samborgara síns þó sjálfur hefði hann fengið gríðarlega háa skuld afskrifaða af hendi konungsins. Konungi var ekki skemmt:

„Illi þjónn, alla þessa skuld gaf ég þér upp, af því að þú baðst mig. (33) Bar þér þá ekki einnig að miskunna samþjóni þínum, eins og ég miskunnaði þér?" (34) Og konungur varð reiður og afhenti hann böðlunum, uns hann hefði goldið allt, sem hann skuldaði honum. (35) Þannig mun og faðir minn himneskur gjöra við yður, nema hver og einn yðar fyrirgefi af hjarta bróður sínum. Mat 18:32b-35

Myndin sem er dregin upp er að vera varpað í fangelsi þar sem böðlar sjá um að valda föngunum þjáningu. Jesús er að segja: Ef þú ert ekki tilbúinn að fyrirgefa öðrum þrátt fyrir að hafa sjálfur þegið fyrirgefningu þá mun ófyrirgefningin varpa þér í fangelsi og hlekki sem valda þér þjáningum. Þér mun líða ömurlega þangað til þú iðrast, fyrirgefur og ert leystur.

Biðjum saman: Drottinn Jesús, þú er sannur læknir og huggari. Ég horfast í augu við hversskonar slæmar minningar, missi og særindi sem ég hef upplifað og hefur ekki verið fyrirgefið. Ég vil telja upp í ástæðurnar fyrir sársaukanum sem ég hef upplifað (teldu þetta upp eða sem er enn betra: Skrifaðu þetta niður). Þessa reynslu og særindi vil ég koma með til þín og leggja við fætur þína. Hjálpaðu mér að fyrirgefa. Jesús, þar sem hefur verið ófyrirgefning, gefðu að þar verði fyrirgefning núna. Ég vel núna að fyrirgefa hverjum þeim sem hefur gert mér illt og ég vel að sleppa tökunum á biturð og ófyrirgefningu. Ég vel líka að fyrirgefa sjálfum mér fyrir það skammarlega og ranga sem ég hef gert og meðtaka fyrirgefningu Guðs í gegnum Jesú Krist. Hvar sem óvinurinn hefur náð fótfestu í lífi mínu bið ég þig Jesú um lausn, byggða á þessari fyrirgefningu. Ég fel líf mitt í þínar hendur, í Jesú nafni, Amen.

Íhugun og framkvæmd

  1. Lestu Jes 61:1-4 Hvað í þessum versum uppörvar þig mest og hvers vegna?
  2. Hvers vegna er oft erfitt fyrir fólk að koma til Guðs og fá lækningu í það sem er laskað af fortíðinni? Hvað gerir það erfitt fyrir þig að koma til Guðs?
  3. Hefur einhver sært þig sem þú þarft að fyrirgefa? Það getur verið gott að skrifa þetta niður og biðja svo yfir því með bæn svipaðri þeirri sem er hér fyrir ofan.

Smelltu á hnappinn hér fyrir neðan til að hlusta/horfa á Ágúst Valgarð Ólafsson predika um efni þessa pistils.

Laus frá girnd

Skrifað af Þorsteinn Jóhannesson. Posted in Pistlar

Á síðustu tuttugu og fimm árum hafa nokkrir forstöðumenn í frjálsum söfnuðum hér á landi orðið að hætta forstöðu sökum framhjáhalds þeirra eða maka þeirra. Í öllum tilvikum hafði þetta þau áhrif að söfnuðirnir löskuðust.

Hvað veldur því að fólk sem okkur finnst að ætti að vita betur gerir svona hluti? Biblían svarar því þannig að „Það er eigin girnd, sem freistar sérhvers manns og dregur hann og tælir. Þegar girndin síðan er orðin þunguð, elur hún synd, og þegar syndin er orðin fullþroskuð, fæðir hún dauða.” (Jak. 1:14-15).

Ég er viss um að þessir forstöðumenn eða makar þeirra ætluðu aldrei að halda framhjá en eitthvað varð til þess að þeir fjarlægðust Guð og hleyptu girndinni að sem varð að lokum til þess að þeir héldu framhjá.

Jesús kenndi okkur í faðirvorinu að við ættum að biðja „Gef oss í dag vort daglegt brauð”, hann kenndi ekki að við ættum að biðja um vikulegt brauð eða mánaðarlegt, þannig að ef við viljum standast þá þurfum við daglega að biðja og við þurfum daglega að lesa í Biblíunni.

En við þurfum líka að forðast það sem við vitum að hefur ekki góð áhrif á okkur. Ef það er eitthvað sem við horfum á sem gerir okkur ekki gott þá verðum við að hætta að horfa á það. Ef það er persóna sem hefur slæm áhrif, þá hætta að umgangast hana. Hvað sem það er sem getur valdið því að við gerum rangt þá eigum við að láta það eiga sig og ef ekkert annað dugir þurfum við að flýja, eða eins og Biblían segir „Flýið saurlifnaðinn!” (1 Kor 6:18).

Ef þú hins vegar upplifir að girndin sæki að þér og þú ert alltaf að falla fyrir því sama og hversu mikið sem þú reynir þá getur þú ekki hætt að girnast, þá getur verið að þú sért bundinn. Ef svo er þá er samt til lausn sem felst í að þú þarft að játa syndir þínar fyrir Jesú og biðja hann að fyrirgefa þér. En þú þarft líka að játa fyrir einhverri manneskju sem þú treystir og fá aðra trúaða til að standa með þér í bæn fyrir þér að þú losnir undan girndinni (Jak. 5 14-16), og trúarbænin mun gera þig frjálsan.

Íhugun og framkvæmd

  1. Sumir upplifa óánægju með sumt af því sem Guð hefur gefið þeim eins og vinnu, hjónabandið, fjármálin, vinina og svo framvegis. Hvernig hefur þú farið að við að hertaka svona hugsanir og velja æðruleysi og ánægju? 
  2. Hvernig hefur þú upplifað kærleika Jesú gagnvart þér?
  3. Hver er lykillinn að því að sigrast á girndinni samkvæmt Róm. 8:13 og hvernig hjálpar Heilagur Andi okkur við það? Því að ef þér lifið að hætti holdsins, munuð þér deyja, en ef þér deyðið með andanum gjörðir líkamans, munuð þér lifa (Róm. 8:13).
  4. Hvernig þekkjum við munin á heilbrigðri löngun eða girnd sem er gefin af Guði eða spilltri girnd. Lesið eftirfarandi vers áður en þið svarið spurningunni: Orðskv.10:24, Lúkas 22:15, Títus 2:12, 2 Tím. 2:22

Smelltu á hnappinn hér fyrir neðan til að hlusta/horfa á Þorsteinn Jóhannesson predika um efni þessa pistils.

Gjafir eða græðgi

Skrifað af Ágúst Valgarð Ólafsson. Posted in Pistlar

Hvað er græðgi? Í stóru orðabókinni um íslenska málnotkun eru dæmin fégræðgi, matgræðgi, landagræðgi, valdagræðgi og lífsþægindagræðgi. Robert Morris sagði: Græðgi er að hafa allt sem þú þarft og vilja meira.

Í seríunni „Frelsið er yndislegt” skoðum við hvað getur skaðað frelsi okkar. Græðgi er eitt af því. Sá sem vill eyðileggja líf okkar, Satan, getur notað græðgi til að setja okkur í hlekki.

Jesús talaði um eignir og fjármál í 16 af þeim 38 dæmisögum sem eru í NT. Það hefði hann ekki gert nema af því að þetta er mikilvægt efni. Ein af þessum dæmisögum er í Lúk 12:13-21:

Einn úr mannfjöldanum sagði við hann: „Meistari, seg þú bróður mínum að skipta með mér arfinum." (14) Hann svaraði honum: „Maður, hver hefur sett mig dómara eða skiptaráðanda yfir ykkur?" (15) Og hann sagði við þá: „Gætið yðar, og varist alla ágirnd. Enginn þiggur líf af eigum sínum, þótt auðugur sé." (16) Þá sagði hann þeim dæmisögu þessa: „Maður nokkur ríkur átti land, er hafði borið mikinn ávöxt. (17) Hann hugsaði með sér: ,Hvað á ég að gjöra? Nú get ég hvergi komið fyrir afurðum mínum.' (18) Og hann sagði: ,Þetta gjöri ég: Ég ríf hlöður mínar og reisi aðrar stærri, og þangað safna ég öllu korni mínu og auðæfum. (19) Og ég segi við sálu mína: Sála mín, nú átt þú mikinn auð til margra ára, hvíl þig nú, et og drekk og ver glöð.' (20) En Guð sagði við hann: ,Heimskingi, á þessari nóttu verður sál þín af þér heimtuð, og hver fær þá það, sem þú hefur aflað?' (21) Svo fer þeim er safnar sér fé, en er ekki ríkur hjá Guði."

Þetta „Seg þú bróður mínum…” í v13 minnir á barn sem segir „Mamma! Segðu Sigga að skila bílnum mínum!” Miðað við söguna sem Jesús segir í kjölfarið þá var þessi krafa um skipti arfsins knúin af græðgi. Jesús segir: Mitt verkefni er ekki að skipta eignum, mitt verkefni er að bjarga sál þinni.

Land ríka mannsins ber mikinn ávöxt (v16), greinilega meiri uppskera en gert hafði verið ráð fyrir. Vandamálið er hvar á að koma allri þessari uppskeru fyrir. Rökin eru að því meira af eignum og fjármunum sem hann eigi, því lengur og betur geti sál hans hvílt sig, etið, drukkið og verið glöð (v19). Eða í stuttu máli: Því meira gull => Því meiri sálarfriður. Jesús kallar þetta heimsku (v20).

Aðalmálið hér er sál ríka mannsins, ekki eignir hans. Guði er umhugað um sál hans og því hefði hann viljað sjá hann gefa af eigum sínum. Í staðinn verða eignir hans til þess að eyðileggja og binda sál hans. Hann valdi græðgi í stað gjafa og sál hans galt fyrir.

Okkur er falið að sjá um sál okkar en svo kemur að því að hún verður heimt af okkur og þá er spurt: Hvert er ástandið á sáli þinni? Hver er staðan á sál þinni? Það sem situr eftir eru ekki eignir heldur sál okkar. Sál okkar er það eina eilífa sem við höfum ráðsmennsku með. Með því að gefa reglulega forðum við því dýrmætasta sem við eigum undan græðgi: Sál okkar. Græðgi skaðar sál okkar og er opnar dyr fyrir óvininn.

Íhugun og framkvæmd

  1. Finnst þér erfitt að gefa? Ef svo er, hvað er það sem er erfitt við að gefa?
  2. Hvað finnst þér um það að sál þín sé það dýrmætasta sem þér hefur verið falin ráðsmennska með?
  3. Gott ráð til að forða sál okkar frá græðgi er að gefa reglulega og þannig að það telji. Hvað finnst þér um það og er eitthvað sem þú ætlar að gera öðruvísi í lífi þínu eftir að haga íhugað þetta efni?

Smelltu á hnappinn hér fyrir neðan til að hlusta/horfa á Ágúst Valgarð Ólafsson predika um efni þessa pistils.

Velkomin(n) á póstlistann okkar.

Skylt efni

Hvítasunnukirkjan á Selfossi